بچوں کی زیابیطس

ایک نئی تحقیق سے معلوم ہوا ہے کہ حالیہ سالوں کے دوران بچوں میں ٹائپ ون ذیابیطس کے کیسوں میں بہت زیادہ اضافہ ہوا ہے۔

امریکی طبی ماہرین کی طرف سے کی گئی ایک تحقیق کے مطابق امریکی ریاست فلاڈیلفیا میں گزشتہ دو دہائیوں کے دوران پانچ برس سے کم عمر کے بچوں میں اس بیماری میں اضافہ حیران کن ہے۔ اسی طرح امریکا اور یورپ میں بھی اس مرض کے شکار لوگوں میں اضافہ نوٹ کیا گیا ہے۔

والدین کو خیال رکھنا چاہیے کہ ان کے بچوں کا طرز زندگی صحت مندانہ ہو اور ان کا وزن زیادہ نہ بڑھے

Diabetes Care نامی ایک امریکی جریدے میں شائع ہونے والی اس تحقیق کے مطابق 1985ء اور 2005ء کے درمیان بچوں میں ٹائپ ون ذیابیطس کے کیسوں میں 70 فیصد اضافہ ہوا۔ ان تمام بچوں کی عمریں پانچ برس یا اس سے کم تھیں۔ یہ امر اہم ہے کہ اس بیماری کے حوالے سے اعداد و شمار جمع کرنے کا سلسلہ 1985ء میں ہی شروع کیا گیا تھا۔ اسی طرح چودہ برس کے بچوں میں اس بیماری کی شرح میں انتیس فیصد اضافہ دیکھا گیا۔

بچوں میں اس بیماری کا پایا جانا ایک راز ہے

اس تحقیق کے مصنف ٹیری لپمین یونیورسٹی آف پینسلوینیا کے اسکول آف نرسنگ سے وابستہ ہیں۔ انہوں نے ان اعداد و شمار پر تبصرہ کرتے ہوئے بتایا، ’’ہم بچوں میں ٹائپ ون ذیابیطس کے کیسوں میں اتنا اضافہ کیوں دیکھ رہے ہیں، بد قسمتی سے ہمارے پاس اس کا جواب نہیں ہے۔‘‘

ذیابیطس کی ایک عام قسم ٹائپ ٹو ہے، جو زیادہ تر بالغوں کو ہوتی ہے، جن کا مدافعتی نظام انسولین پیدا کرنے کے قابل ہوتا ہے تاہم اس بیماری کے باعث ان کا جسم ہارمون کے استعمال سے خون میں شوگر کی مقدار کو کنٹرول کرنے کے قابل نہیں رہتا۔

ٹائپ ون ذیابیطس عمومی طور پر بچوں کو لاحق ہوتی ہے، جس کے نتیجے میں ان کا لبلبہ انسولین بنانے کے قابل نہیں رہتا۔ اس بیمای کا اگر مناسب علاج نہ کیا جائے تو یہ مہلک ثابت ہو سکتی ہے۔ ٹائپ ون ذیابیطس میں انسولین کا لینا انتہائی ضروری ہوتا ہے جبکہ دوسری قسم کی ذیابیطس ادویات، ورزش اور کھانے میں احتیاط کے ذریعے کنٹرول کی جا سکتی ہے۔

امریکی شہر نیویارک میں ذیابیطس کے ماہر ڈاکٹر کیرل لیوی کے بقول بچوں میں اس بیماری کا پایا جانا ایک راز ہے، جس کی حقیقت ابھی تک معلوم نہیں ہو سکی ہے۔ ان کا کہنا ہے کہ والدین کو خیال رکھنا چاہیے کہ ان کے بچوں کا طرز زندگی صحت مندانہ ہو اور ان کا وزن زیادہ نہ بڑھے۔

علامات پر دھیان دینا ضروری ہے

بچوں میں اس بیماری کے حیران کن اضافے سے متعلق کئی وجوہات پیش کی جاتی ہیں۔ بچوں میں وٹامن ڈی کی کمی اور ماں کے دودھ کا نہ پینا اس بیماری کی وجوہات قرار دی جاتی ہیں۔ اسی طرح کہا جاتا ہے کہ بچوں کو مہیا کیا جانے والا ضرورت سے زیادہ صاف ماحول بھی مدافعتی نظام کو کمزور بناتے ہوئے اس بیماری کا باعث بن سکتا ہے